သက်တံ့အယ်ဒီတာအဖွဲ့

မတ်လ ၁ဝရက်၊ ၂ဝ၁ဝခုနှစ်

Kim Petras

ကမ္ဘာ့အသက်ငယ်ဆုံး လိင်ပြောင်းလဲခွဲစိတ်ထားတဲ့ အဆိုတော်လေးရဲ့ Die for you လို့အမည်ရတဲ့ Single တေးသီချင်းလေးဟာ ဂျာမန်လူငယ်ထုတွေကြား လူကြိုက်များနေတယ်လို့ သတင်းရရှိပါတယ်။ အဲဒီ ကမ္ဘာ့အသက်ငယ်ဆုံး လိင်ပြောင်းလဲခွဲစိတ်ထားသူလေးရဲ့ နာမည်ကတော့ ခင်မ် ပက်ထရက်စ်(Kim Petras)လို့ခေါ်တဲ့ ဂျာမန်နိုင်ငံသူလေးပဲ ဖြစ်ပါတယ်။

ခင်မ် ပက်ထရက်စ်ဟာ အမှန်တကယ်မွေးဖွားလာတုန်းကတော့ တင်မ် ပက်ထရက်စ်(Tim Petras)ဆိုတဲ့ ယောက်ျားလေးအနေနဲ့ဖြစ်ပါတယ်။ ဒါပေမယ့်လို့ အသက် ၁၆နှစ်ပြည့်တဲ့အချိန်မှာတော့ သူ့ရဲ့ စိတ်ကူးအိပ်မက်တစ်ခုဖြစ်တဲ့ မိန်းကလေးတယောက်ဘဝကို လုံးဝခွဲစိတ် ပြောင်းလဲခံယူလိုက်တာဖြစ်ပါတယ်။

အသက် ၁၆နှစ်သာရှိသေးတဲ့ ခင်မ်ကို လွန်ခဲ့တဲ့ ၁၉၉၂ခုနှစ်က ဂျာမဏီနိုင်ငံ ခုံလုံမြို့(Cologne)မှာ မွေးဖွားခဲ့တာဖြစ်ပါတယ်။ အခုလိုမျိုး ခင်တယောက် ပိုမိုနာမည်ကြီးလာတာဟာဆိုလို့ရှိရင် ဂျာမဏီနိုင်ငံမှာ ဥပဒေအရ လိင်ပြောင်းလဲခွဲစိတ်ခွင့်ကို အသက်၁၈နှစ်ပြည့်ပြီးမှာသာလျှင် ခွင့်ပြုလေ့ရှိပေမယ့် ခင်ကိုတော့ အသက် ၁၆နှစ်မှာတင် ခွဲစိတ်ခွင့်ရခဲ့တဲ့အတွက်ကြောင့် ကမ္ဘာ့အသက်ငယ်ဆုံး လိင်ပြောင်းလဲခွဲစိတ်ထားသူ တယောက်အနေနဲ့ ပိုမိုလူသိများတာဖြစ်ပါတယ်။

မိဘနှစ်ပါးကလည်း ခင်ငယ်ငယ်ကတည်းက မိန်းကလေးတယောက်လို ဝတ်စားဆင်ယင်နေထိုင်တာကို ကောင်းကောင်းမွန်မွန် ကူညီထောင့်ပံ့ ပေးခဲ့တဲ့အတွက်ကြောင့် ဒီနေ့ဒီအချိန်မှာ သူ့ရဲ့ လိင်ပိုင်းဆိုင်ရာနဲ့ ပတ်သက်လို့ ဘယ်စိတ်ဒုက္ခဆင်းရဲမှ မခံစားခဲ့ရဘူးလို့လည်း ဆိုပါတယ်။

အခုလို လိင်ပြောင်းလဲခွဲစိတ်တာနဲ့ပတ်သက်လို့ သတင်းမီဒီယာက မိန်းမတယောက်လိုနေရတာ စိတ်ထဲမှာ ဘယ်လိုနေလဲလို့ မေးလာတဲ့အခါမှာ “ကျမကတော့ ဟိုးအရင်ကတည်းက မိန်းမတယောက်လိုပဲ ကိုယ့်ကိုယ်ကိုယ်ခံစားရတယ်။ ကျမမိန်းမတယောက်ပါပဲ။ လွဲနေတာတစ်ခုပဲရှိတယ်။ အဲဒါက ကျမစိတ်က ကျမနဲ့မကိုက်ညီတဲ့ ခန္ဓာကိုယ်ထဲရောက်နေရတာပါပဲ”လို့ ပြန်လည်တုံ့ပြန်ပြောဆိုခဲ့ပါတယ်။

Kim Petras၏ အမှတ်တရပုံရိပ်တချို့

Source: http://ladeez-b.blogspot.com/